Dit 9 : Comme debas et questions (MCCCCI)
Cy parle d’une sentence donnee contre aucuns de Vitry pour un debat meu soudainement entr’eulx
1 Comme debas et questions
2 Et fumeuses dissencions
3 Fussent hier meuz en la taverne,
4 Ou nostre empire se gouverne, 408d
5 Aprés souper et sur le tart,
6 Entre un nommé maistre Gerart
7 Des requestes de nostre hostel,
8 Et Jehan Deschamps d’autre costel,
9 Lesquelz orent un grant hutin
10 Entr’eulx pour la force du vin
11 Qui en cervel les ot tappéz,
12 Tant que l’un dist : ― Vous y mentéz
13 Et l’autre qui va respondant :
14 ― Mais vous mentéz mauvaisement.
15 Et ainsi par .iii. fois ou quatre
16 Se commencerent a debatre,
17 A desmentir, a parler hault,
18 Car pour le vin furent trop chault,
19 En continuant la rumeur
20 Qui se commença par chaleur
21 Pour neant, devant le Bailli,
22 Mais une autre noise sailli
23 Tantost entre messire Ogier
24 Encontre Arnault le Tapicier,
25 Qui prindrent a compter ensemble
26 Fumeusement et si nous semble
27 Que la fut maintenue l’ordre
28 Si bien que nulz n’y sçaroit mordre
29 Que n’ait esté[1] executee
30 Selon l’estat de la Fumee,
31 En fumant fort en trestouz cas.
32 Aprés vint uns autres debas
33 De Robinet, le clerc Arnault,
34 Et d’un autre qui parloit hault
35 Et qui est chevaucheur du Roy.
36 La veissiéz [par trop] grant desroy
37 Tancier en .vi. lieux ou en sept,
38 Et commencier hutin et plet, 409a
39 Et tant, que le Bailli commence,
40 Qui ravoit du vin en la pance,
41 A adrecier ceuls qui tançoient,
42 En disant que trop mal faisoient,
43 Et que c’estoit grant mesprison,
44 Et les vouloit en la prinson
45 Envoier, tant se courçoit fort,
46 Et disoit qu’ilz avoient tort,
47 Et se vouloit ainsi courcier,
48 Comme avoit [ja] fait le premier.
49 La pouoit on a leur maniere
50 Trouver ceuls qui de la banniere
51 Doivent estre de nostre empire.
52 De noz gens furent tuit li pire,
53 Le Poursuigant, nostre escuier,
54 Et nostre fumeux chancelier,
55 Cloart Cathon, lesquelz se turent,
56 Et point de fumee n’esmurent,
57 En eulx moustrant sanz raisons saiges
58 Et en corrompant noz usaiges
59 Faintement, dont il nous desplaist.
60 Et des autres forment nous plaist,
61 Qui vraiz subgiéz moustréz se sont,
62 Et encor de jour en jour font.
63 Et pour ce que lidiz Baillis
64 S’est enforciéz de noz subgis
65 Faire couvenir devant lui,
66 Et il n’appartiengne a autrui
67 De telz debas la congnoissance,
68 Fors a la superlicoquance
69 De nostre court imperial,
70 Nostre procureur general
71 A quis a avoir le renvoy
72 De nos gens au Bailli du Roy, 409b
73 Lequel heu, venu les parties
74 En la vourt, ycelles oyes
75 Et ce qu’ont voulu proposer,
76 Veu que ce fut aprés souper,
77 Et que le mouvement du vin
78 Leur fist commencier le hutin,
79 Consideré que l’endemain
80 Chascun avoit plus soif que faim,
81 Et que tantost qu’ilz se leverent,
82 Incontinent boire en alerent,
83 Pour le vin qu’ilz burent au soir
84 Qui leur faisoit le chief doloir,
85 Veu qu’il ne leur souvenoit pas
86 De la moitié de leurs debas,
87 Et que courroux ne doit tenir
88 Qui veult nostre ordre maintenir :
89 Commencier doit soudainement,
90 Et definer legierement,
91 Oy quanqu’ilz ont voulu dire,
92 Selon l’estat de nostre empire,
93 Considerees leurs raisons,
94 Avons a droit dit et disons
95 Que toutes les dictes parties
96 Qui par courroux furent parties
97 Sont, demeurent et demourront
98 Bon ami, et se deporteront
99 Foy et amour comme devant.
100 Mais ilz se donrront boire avant
101 Par bonne paix et par concorde
102 L’un l’autre, car la court l’acorde,
103 Et demourront en bonne paix
104 L’un envers l’autre desormais,
105 Selon la teneur de l’arrest.
106 Si mandons c’un ergent soit prest, 409c
107 Qui pour afiner ceste guerre,
108 Face tout plain de vin le voirre,
109 En executant la sentence,
110 Et die a aucun qu’il commence
111 A boire. Lors yert reformee
112 Selon l’estat de la Fumee,
113 La paix et la guerre faillie.
114 Soubz le seel de nostre baillie,
115 Donné en la taverne, en glay,
116 .Xxiiie. jours[2] de may.
[1] Ms. este bien
[2] Raynaud corrige en jour
