Dit 7 : Eustace, empereur des Fumeux (MCCCXCIX)
D’une autre commission d’un chien
1 Eustace, empereur des Fumeux,
2 A nostre amé Robin le Queux
3 Salut ! Nous avons entendu
4 Qu’un chien, qui puist estre pandu,
5 Mardi, quant le grant vent venta,
6 De nuit en larrecin entra
7 Par un trou en nostre celier,
8 Et de fait dessoubz un cuvier
9 Ravi dix pieces de mouton,
10 Et sanz vouloir prandre rançon
11 Les manga, destruit et gasta,
12 Et de rissir hors se hasta,
13 En transportan sa roberie
14 Du celier en la boucherie
15 Dont cilz est nourris et estrais
16 Qui ces malefices a fais, 406b
17 En commettant prinson privee
18 Et crime de chose robee,
19 De pillaige et de larrecin
20 Mauvaisement, s’il est ainsin,
21 Et en cumulant mal sur mal.
22 Ly mastins qui estoit a val,
23 Plains du meffait, en un planchier
24 Vint son orde pence a lachier,
25 Telement que par son oultraige
26 Nous despissa sur le visaige
27 Et gasta nous et nostre gent
28 Qui se dormoient pour le vent,
29 Si fort qu’esveillier nous couvint,
30 Et si ne sçumes dont ce vint
31 Pour l’eure, mais puis sceusmes bien
32 De certain que cefist le chien,
33 Qui telement nos conchia
34 Et en oultre sur nous chia,
35 En petit prisant nostre empire,
36 Dont nous n’avons talent de rire
37 Jusqu’a tant qu’il en soit pugnis
38 Et que du corps en soit honnis.
39 Et pour ce que tel malefice
40 se despendent de vostre office,
41 Et que toute correpcion,
42 L’amende et la punicion
43 De ce mesfait vous appartient,
44 Pour ce que pugnir le couvient
45 Estroictement, vous commandons
46 Que vous aiéz .ii. vers batons,
47 Et qu’en tous lieux et par main mise
48 Que trover pourrés hors d’eglise
49 Ce chien qui a fait le delit
50 Et tous mastins en son despit 406c
51 Adjournéz au travers des costes,
52 Qu’ainsi le veult Regnault, nostre hostes,
53 Pour ce que il restablira
54 Le mouto nque le chien embla,
55 En frapant si fort qu’il y pere,
56 Et que li chiens le fait compere.
57 Et s’ilz vont en vostre cuisine,
58 Faictes leur mesurer l’eschine
59 Du pestail dont on bat les aulx,
60 Tellement que li desloyaulx
61 Se puist a plain apercevoir
62 Qu’il n’a pas fait nostre vouloir.
63 Et en signe qu’il a robé,
64 Vous mandons qu’il soit eschaudé
65 De chaude eaue dessus sa pel,
66 [Et] non obstant aucun appel.
67 Et s’il va en la chambre aux clers,
68 S’il ne s’en va vestus de pers
69 Par force d’estre bien bastus,
70 Ilz seront comme foulz tondus,
71 Et s’ilz n’ont la queue coupee
72 En signe de chose robee
73 Et d’estre a tousjours mais bannis
74 De nostre empire et du pais.
75 Et pour mieulx vengier noz dommaiges,
76 Avons fait commander aux paiges
77 Que s’ilz s’embatent es estables,
78 Que de gros bastons couvenables
79 Les paient par tele maniere
80 Qu’ilz n’aient cause ne matiere
81 De sejourner en nostre court,
82 Et qu’en nostre hostel n’ait si sourt
83 Qui ne les puist bien oir braire
84 Des maulx que nous leur ferons faire.
85 Si mandons atoutes noz gens 406d
86 Q’un[1] chascun d’eulx soit diligens
87 D’acomplir ce present escript
88 Et tout ce que nous avons dit.
89 Donné soubz nostre seel a Fymes.
90 Point la, Rochet, cy faillent rymes.
[1] Raynaud corrige en Qu’un
