Virelay 55 : Pour ma longue demouree (DCCXXXIX)

Autre Virelay

            Pour ma longue demouree
            Ne pour mon departement
            Ne devéz faire tourment,
            Ma douce dame honoree.

5          Car je say certainement
            Que vous m’améz loyaulment
            Plus que creature nee
            Et que vous doubtéz forment
            Mon tardif retournement,

10        Et que je n’aye pensee
            De continuer m’alee
            Et poursuir longuement.
            S’en devriéz joyeusement
            Moy dire qu’il vous agree.
15        Pour ma longue demouree etc.

            Et si savéz vrayement
            Que d’Itale aucunement
            Ne fiz onques desevree,
            Et je dois presentement
20        Veoir le contenement

            De la tresdouce contree
            De France la renommee,
            Dont mieulx vauldray grandement
            D’onnour et d’esbatement :
25        Si devéz estre apaisiee.
            Pour ma longue demouree etc.