Virelay 50 : Mes dames, je vous mercie (DCCXXXIV)

Virelay

            Mes dames, je vous mercie
                        Et gracie
            Trestoutes, cent mille foys,
            Et Dieu gart saint Jehan ou boiz
5          Ou il a tel compaignie,

            C’onques en paiz françoiz
                        Plus courtoiz
            Maintieng ne chiere plus lie
            Ne vy ne verray des moiz.
10                    Or m’en voiz
            Dolens a chiere esbahie.

            Las ! cum adure departie !
                        Sanz partie
            Me faut partir mis et coys.
15        Prins m’a vostre douce voix
            Dont il convient que je dye :
            Mes dames, [je vous mercie.]

            Je demour en vos destroys
                        Trop destroiz.
20        Pour Dieu ne m’oubliéz mie.
            Mon cuer se rent a son choys,
                        Et fust roys,
            Convers de vostre abbaye.

            Recevéz loy, je vous prie     195c
25                    Et supplie :
            Porter veul voiles et ploys.
            Or regardéz se c’est droys,
            Et dittes : je le t’otroys[1].
            Mes dames, [je vous mercie.]

[1] Ms. totry