Virelay 40 : Riche beauté ou j’ay tout mon recours (DCCXXIV)
Autre Virelay
Riche beauté ou j’ay tout mon recours,
Qui Seneque passéz de bonnes mours,
Je vous doy bien hautement mercier,
Qui recevéz un si povre escuier,
5 Et qui pouéz trop mieulx choisir aillours.
Comment se puet de tant humilier
Vostre hault nom n’en si bas lieu lier ?
Vir ne le puis se ne fust vostre honnours.
Car je vail pou, ne de moy travaillier
10 En fait d’armes ne say pas le mestier.
Vo pris est grant, petite ma valours. 193a
Maiz vous estes la flour de toutes flours
Et la douçour de trestoutes douçours,
Qui ne voudroit nul ame deprisier.
15 Vostre grant bien en a fait un millier
Hardiz et preux et vaillans combatours.
Riche beauté [ou j’ay tout mon recours.]
Las ! je ne puis vostre nom oublier,
Car qui se veult a honour alier
20 A vostre bien doit avoir ses recours.
Ainsi pourra tous maulz contralier,
Et tous vices en soy amolier
Comme a celle qui estes li secours
D’assouagier toutes dures dolours.
25 Or sui pour vous en larmes et em[1] plours,
Hors de paiz, comme povre estrangier,
Que reffus a de vous fait estrangier,
Maiz je m’aten a vous et a Amours.
Riche beauté [ou j’ay tout mon recours.]
30 Or vous doy bien, dame, regracier,
Quant he perçoy qu’en vous n’est le dangier
Du reffuser qui m’a mis es destours
De vo gent corps tristement eslongier
Et en desers estranges voiaigier
35 Ou je seray plus sauvages c’uns ours.
Car la sera ma demeure a tousjours,
Acompaigné de dueil et de tristours.
La ne pourray fors que pour vous prier
Et humblement a vous mercy crier.
40 Mais encor ay espoir d’estre ressours.
Riche beauté [ou j’ay tout mon recours.]
[1] Saint Hilaire corrige en en