Virelay 31 : Qui veult vivre a chiere lie (DCCXV)

Autre Virelay 190d

            Qui veult vivre a chiere lie
            Delaisse orgueil et envie,
            Soit humble[s] a seurveir,
            Et paciens a souffrir.
5          Gart que de nul ne mesdie,

            Face a un chascun plaisir
            En bien sanz villain desir,
                        Ne se vente mie.
            Honnestement en vestir
10        Se puet et doit maintenir,
                        Sanz faire folie.

            Ainsi porra bonne vie
            Mener et sans villenie
                        Partout poursuir,
15        Soy faire amer et chierir,
            Desirer sa compaignie.
            Qui veult vivre [a chiere lie.]

            Quant on naist il fault mourir.
            Riens ne vault l’ennorguillir
20                    Pour grant seignourie.
            Amer Dieu et conjoir,
            Bien faire et soy esjoyr
                        Doit de sa partie

            Chascun, et merencolie
25        Rebouter comme ennemie
                        Qui fait deperir
            Le triste cuer et morir
            Par son art et tricherie.
            Qui veult vivre a chiere lie.

30        Qui se vouldra contenir
            En grance au monde, et fenir
                        En joye florie,
            Ait ses[1] opins en souvenir,
            Et il ne pourra faillir,           191a
35                    S’il les estudie,

            Qu’il n’ait a la departie
            Paradiz et qu’il ne die,
                        A bien avertir,
            Qu’ainsi se doit homs chevir,
40        Et pour ce a dire mafye :
            Qui veult vivre a chiere lie.

[1] Saint Hilaire corrige en ces