Virelay 11 : Fay tousjours ce que tu doys (DLXV)
Autre Virelay
Fay tousjours ce que tu doys :
Ne t’esbahy se tu voys
Auc[u]ne chose grevayne.
Ce qui puet avenir veigne :
5 Dieux cognoist tout une foys.
Convoitise ne te praigne,
N’envie ne te souspraigne,
Maiz soyes douls et courtoys,
Qu’au fort li mauvaiz ont payne
10 Et renommee villayne,
Et les bons bien, car c’est droiz.
Maulx regne un temps comme roys
Et fait les bons trop destroys,
Puis chiet par cause soudayne,
15 Et biens tient droite s’ensaigne.
Pour ce dy celon les droys :
Fay tousjours [ce que tu doys].
Que vault richesse mondayne
Mal acquise ? N’est pas sayne.
20 Mieux vaudroit mangier ses poys
Et boyre yaue de fontayne,
Que consentir chose vayne
Ne pechier pour avoir voys.
Soixante ans ne sont c’un moys
25 Ou un jour souventesfoys,
Que la mort vient tressoudayne
Qui le corps et l’ame enmayne.
Si te conseille a mon choys :
Fay tousjours ce que tu doys. 176b