Chançon royal 27 : Renars estoit jadis en sa tesniere (CCCXXXI)
Balade
Renars estoit jadis en sa tesniere.
Assiegiéz fut du noble lion
D’un seul costé, mais Renars, par derriere,
Fist a son ost mainte derrision.
5 Mainte pierre lui lança de canon
Et maint carrel lui lança d’arbalestre[1].
L’ost fist petit qui estoit grant foison :
L’exploit n’est pas a grant quantité estre.
Car Bruns li ours a tout sa grant banniere,
10 Tybert le chat et Grimbert le tesson,
Et Ysangrin qui sist sur la bruiere,
Ne firent rien fors veoir le dongon.
Trait n’orent [il] ne engin qui fust bon
N’abillement pour assailir cel estre,
15 Et Renars fist toudis sa garnison.
L’exploit n’est pas a grant quantité estre.
Grant temps sont la veans a la barriere,
Cuidans veoir des fosséz la façon :
Mais en veant leur vint de la carriere
20 De Maupertuis maint trait dur et felon.
La fut navré Briquemer et Moron,
Et main bestail qui depuis ne pot pestre
Mort et occis. et en conclusion,
L’exploit n’est pas a grant quantité estre. 109a
25 Le siege estant, vint une pluie fiere,
Qui l’ost moilla entour et environ.
Si firent lors les aucuns mate chiere.
L’un a l’autre disoient : ― Que fait on ?
― Je ne le sçay, dit le sanglier Jefon,
30 Ne je ne sçay dont tel conseil puet nestre,
De venir ci tant bestail[2] de renon :
L’exploit n’est pas a grant[3] quantité estre.
Le singe dist : ― Nul n’enquiert la maniere
De faire assault a loup n’a heriçon.
35 Ceuls qui scevent se traient pour ce arriere,
Je [ne] croy bien que pour ce traction.
Mais je lo bien que nous nous pourveon
Pour assaillir : car Renars est le mestre
A decepvoir. Pour Dieu, or y penson.
40 L’exploit n’est pas a grant quantité estre.
L’envoy
Prince, qui siet devant fort ou maison
Exploictier doit en temps et en saison
Pour assaillir, et son siege repestre,
Et que d’engins ait bonne garnison :
45 A pou de gens ara lors sa raison.
L’exploit n’est pas en grant quantité estre.
[1] Ms. arbaleste
[2] Ms. de bestail
[3] Ms. si grant
