Chançon royal 20 : De tous les maulx qui puent advenir (CCCXXXIV)
Autre Balade
De tous les maulx qui puent advenir
En ce monde soit la terre maudite,
Sanz fruit ne flour ne semence venir,
Sanz avoir loy, si que nulz n’y habite,
5 Et a tous soit la gent du lieu despité.
Comme Caym soient fuians maudis,
Pour leurs meffais, li faulx Flamant traire,
Gand en Flandres et tout le faulx pais.
Qui ont voulu contre droit[1] se tenir
10 Par leur orgueil, s’en aient leur merite.
Leur vray seigneur n’ont voulu obeir,
Leur souverain n’ont prisié une mite.
Ville n’aient, fortresse[2] ne garite,
Destruis soient de tous peuples destruis.
15 A ce coup soit de touz poins entredite
Gand en Flandres et tout le faulx pais.
Trois fois les a le roy fait esbahir :
A Rosebech fut leurs gent desconfite. 110a
Ains l’an aprés vint son siege tenir
20 Devant Bonbourch. Du tiers ne sont pas quicte.
Devant le Dam mist moult de gent eslite
Et l’assiega, et furent assaillis.
A tousjours mais soit ceste fois afflicte
Gand en Flandres et tout le faulx pais.
25 Le roy jamais n’y doye revenir,
Ne moy aussi, a qui riens ne profite.
Cy[3] pers les oeulx, ne je n’y puis dormir
Pour les canons. J’ay leur meschance escripte.
Leur wacarme a troublé mon esperite.
30 Je loge aux champs, je suis touz refroidis.
Je gis armé, ainsis me remerite
Gand en Flandres et tout le faulx pais.
Loger me fault et des branchers cueillir :
Des mareschaulx n’ay pas place a eslite.
35 Le fourrage loing des loges querir
Convient souvent. Mieulx vault vie d’ermite.
Mauvaise eaue ay, je couche sur l’esclite,
War derriere crient paiges toudis.
Pain ne vin n’ay : les plaies ait d’Egipte
40 Gand en Flandres et tout le faulx pais.
L’envoy
Prince[4], a ce coup leur faictes quatre ou quicte,
Sanz retourner tant qu’ilz soient chetis.
Si que jamais par deça ne me quite[5]
Gand en Flandres et tout le faulx pais.
[1] Ms. leur droit segineur
[2] Ms. forteresse
[3] Saint Hilaire corrige en G’y
[4] Ms. Princes
[5] Ms. guide
