Balade 31 : Temps de doleur et de temptacion (XXXI)

Autre Balade

                   Temps de doleur et de temptacion,
                   Aages de plour, d’envie et de tourment,
                   Temps de langour et de dampnacion,
                   Aages meneur pres du definement.
                   Temps plains d’orreur qui tout fait faussement,
5                 Aages menteur, plain d’orgueil et d’envie,
                   Temps sanz honeur et sanz vray jugement
                   Aage en tristour qui abrege la vie.

                   Temps sanz cremeur, temps de perdicion,
10                Aage tricheur, tout va desloiaument,
                   Temps en erreur, pres de finicion,
                   Aage orbeur, plain de ravissement,
                   Temps, voy ton cuer, vien a repentement.
                   Aage pecheur, de tes maulx merci crie.
15                Temps seducteur, impetre sauvement,
                   Aage[1] en tristour qui abrege la vie.

                   Temps sanz douçour et de maleiçon,
                   Aage de puour qui tout vice comprant.
                   Temps de foleur, voy ta pignicion,
20               Aage flateur, saige est qui se repent :
                   Temps, la fureur du hault juge descent,
                   Aage, au jugeur t’ame ne fuira mie.
                   Temps barateur, mue ton mouvement,
                   Aage en tristeur qui abrege la vie.

[1] Ms. Aages