[101a]
36903 C’estoient ceulx certainement
36904 Qui vivoient si bonnement,
36905 Qui estoient si tresbien meu[1],
36906 Dont je vous ay devant leü.
36907 Quant je vis ceste simple gent,
36908 Qui tenoient estat bien gent,
36909 De leur paix couroucié estoie
36910 Et lors les mis je tous en voie
36911 Qu’ilz peüssent laissier arroy,
36912 Affin qu’entre eulx feüssent roy.
36913 Tant les tané que ilz me crurent :
36914 Entre eulx ung grant vilain eslurent
36915 Du lignage du roy Pharaon.[2]
36916 Oncques plus malvais ne vit on,
36917 Et le grant Golïas aussi
36918 De cellui mal lignage issi.
36919 Lors establi je gentillesse
36920 Qui humilité griefve blesse.
36921 Lors fit charité hors chasser
36922 Et toute la terre trachier.
36923 Et la prins fer, or et argent.
36924 La fis departir toute gent
36925 Terres et prez, bois et rivieres.
36926 Cil ot le plus qui plus fort yeres.
36927 La fis je le poeuple combatre,
36928 Le plus fort le plus fesble batre.
36929 Lors fis je taillier pourvëances,
36930 Leurs garnisons et leurz chevances.
36931 Lors fis je les chateaulx drechier,
36932 Charité toute despisier.
36933 Quant aucuns biens tollu avoient,
36934 En iceulx chateaulx les portoient,
36935 Et quant les sieuoient aprez,
36936 Si jettoient cailleux et grez
36937 Que jusqu’a la mort les menoit,
36938 Et lors partir les convenoit.
36939 Et quant iceulx si s’en partoient,
[101b]
36940 Qui le cœur si perdu avoient,
36941 Lors alloient a l’autrui tendre,
36942 Et[3] prenoient ou pouoient prendre.
36943 Pour ce fi je faire chateaulx,
36944 Et les fossés et les creneaulx.
36945 Et cilz trestous premier les firrent
36946 Qui les plus volentiers tollirent.
36947 Ceulx qui tollirent et happerent,
36948 Iceulx les chateaulx commencerent,
36949 Nulle[4] autre œuvre ne faisoient
36950 Fors que tollir la ou pooient.
36951 Ne firent nulle œuvre de main
36952 Fors que tollir et soir et main.
36953 Cilz furent doubté et prisié
36954 Qui deussent estre desprisié.
36955 Pour ce leur vint oultrecuidance
36956 Qui tolt amour et pascïence.
36957 Tolirent a le menu gent
36958 Ablais et bestes et argent.
36959 De povres fis avoir desdain,
36960 Et leur fis croire pour certain
36961 Que li estat de povre gent
36962 Nul temps n’estoit ne bel ne gent.
36963 Povre gent n’est chose que vaille.
36964 Le forment sont, et cilz la paille.
36965 Et bien entendre je leur fis,
36966 Et ilz crurent ce que je dis.
36967 Tant com prez d’eulx vous demourez
36968 Sachiez que leur pillier serez,
36969 Et si venrront vos privetés,
36970 Et ne serés moins d’eulx doubtés,
36971 Et moins vous preteront honneur
36972 Et plus pres d’eulx tenront le leur.
36973 Car cil n’est bon a nul termine,
36974 Cui vous monstrez vostre convine.
36975 Ilz sembloient estre tout ung
36976 La bonne gent et le commun.
[101c]
36977 Et ne sçavoient [riens] cachier,
36978 Tout avoient sans riens muchier,
36979 Ne deffault en nul il n’avoit,
36980 Commun ce que chascun avoit.
36981 Encor ne m’en tins pas a tant :
36982 Pour ce que plus fussent doubtant
36983 Je fis le fort toillir au foible
36984 Argent, et heritage, et meuble.
36985 Des lors fis je les chevaliers
36986 Par Ninus qui les fist premiers.
36987 Cil de mal faire se hasta.
36988 Cil Babilone deserta,
36989 Ochist femmes, hommes, enffans,
36990 Cil qui tant fut mal consentans,
36991 Oncques homs n’avoit sur cheval
36992 Monté, ny amont, ny aval.
36993 Cilz fis je monter les premiers :
36994 Ceulx appelay je chevaliers.
36995 Chevaliers on ne les disoit,
36996 Chevaucheurs on les appelloit.
36997 Quant il tendoit a aucun mal,
36998 Tantost mandoit ceulx a cheval.
36999 Cil les fit mettre es avangardes,
37000 Et les faisoit des chemins gardes.
37001 Ne point de mains ne labouroient.
37002 Des biens d’aultrui ilz se vivoient.
37003 Mais quant je chevaliers les fis,
37004 Communement a tous leur dis :
37005 « Ostés pitié et pacïence,
37006 Humilité et conscïence.
37007 L’autrui amés orgoeul sans paix,
37008 Haultain vous tenez tous adais. »
37009 Je ces commandemens leur dis,
37010 Quant premier chevaliers les fis,
37011 Ne ilz ne l’ont pas oublïé,
37012 Mais l’ont tres bien multiplïé,
37013 Je leur dis que ce estoit ordre,
[101d]
37014 Mais les puches me puissent mordre,
37015 Se ne fut en enffer trouvé !
37016 N’oncques de Dieu ne fut prouvé,
37017 Et si n’est cil qui m’en desdie,
37018 Qu’oncques de Dieu fut establie !
37019 Dieu ne ses sains ne le penserrent.
37020 Deux ordres sans plus ordonnerent,
37021 Et les feïst tout propprement,
37022 Sans aultrui admonnestement.
37023 Ce fu prestrise et marïage.
37024 Ainsi le tesmongnent ly sage.
37025 Mais qui la moye gent querra,
37026 Richesse tierce y trouvera.
37027 Tant mon art multiplïeront,
37028 Q’ung jour venrra que ilz cherront.
37029 Mon art en orgoeul perira.
37030 Bien sçay que Dieu le destruira.
37031 Adés le m’a Raison convent
37032 Et le me ramentoit souvent
37033 Si comme elle fist les Templiers,
37034 Que je fis et maintins si fiers.
37035 Or advisez se j’ay fait bien.
37036 Et Dieu et vous m’en amés bien.
37037 Aprez fis je ung art qui dure :
37038 C’est primes prester a usure,
37039 Car avant point presté n’avoient,
37040 Et de leur labeur se vivoient.
37041 De ce que la terre donnoit
37042 Chascun lïement se tenoit.
37043 Quantz ilz orrent possessïons,
37044 Si garderent leurs garnisons
37045 Et les volrent bien retenir
37046 Que nullui ne les pot tollir.
37047 Et de ce sus eulx se vivoient.
37048 Et mainteffois aucuns estoient
37049 Cui on avoit tolly le leur,
37050 Qui vivoient a grant dolleur.
[102a]
37051 L’autrui demander ne volloient,
37052 Ne point aprins ilz ne l’avoient.
37053 Quant a aucun vivre falloit,
37054 Tout maintenant son huis clouoit
37055 Et fermoient sans plus ouvrir,
37056 Et[5] se laissoient dedens morir.
37057 Tant qu’il advint a cellui temps
37058 Deux Juïfs orent deux enffans.
37059 Les deux enffans si s’entramoient
37060 [Que] l’un sans l’autre ne voulloient
37061 Ne l’un sans l’autre volloit estre.
37062 Mais trop mal fu party leur estre
37063 Si com l’Escripture l’afiche,
37064 Que l’un fu povre et l’autre riche.
37065 L’un ot des garnisons plenté,
37066 Et l’aultre eult assés povreté.
37067 Ung jour s’allerent compagnier,
37068 Les deux enffans, et eulx bagnier,
37069 Si comme ilz s’en[6] revenoient,
37070 Ces deux enffans qui si s’aimoient
37071 Que plus ne porrent demourer,
37072 Le povre se print a plourer
37073 De grant meschief, de cœur parfont,
37074 A peu que le cœur ne lui font,
37075 Et quant son compains l’a veü,
37076 Doeul et pitié en a eü :
37077 « Hellas ! dist il, compains, qu’avez ?
37078 Dittes moy qu’avés a plourer ? »
37079 Dist le povre : « Je n’en puis mais.
37080 Compains, ne vous verray jamais,
37081 Jamais[7] n’aray joye ne deduit.
37082 Nous finerons en ceste nuit :
37083 Failly nous est tout nostre vivre,
37084 Dorenavant ne poons vivre.
37085 Compains, a Dieu je te command,
37086 Car ne poeult[8] estre aultrement. »
37087 Si tost que son compains l’oÿ,
[102b]
37088 Tout adés a terre cheÿ.
37089 Le povre enfant si se depart
37090 Et tost s’en alla aultre part.
37091 Ly aultre si grant [doeul] menoit,
37092 A peine qu’il ne s’ochioit.
37093 Son pere et sa mere l’oÿrent,
37094 A haulte voix tous deux lui dirent :
37095 « Pour Dieu, beaulx filz, et que avez ?
37096 Dittes nous pour quoy vous plourez.
37097 ― Beau pere, qui mais m’amera ?
37098 Mon compains anuit finera,
37099 Car de fain le convient perir.
37100 Avec lui me lairay morir.
37101 « Beaulx filz, quel conseil en prenray ?
37102 Or le me dy, je le feray.
37103 ― Beau pere, vous lui presterez,
37104 Et loialment vous le rarez,
37105 Mais qu’il soit de cest pas sailly,
37106 Et que ses messons ait coeully,
37107 Et j’en seray pour lui teneur,
37108 Et de ses biens meismes rendeur,
37109 Qu’assez tost sera la saison,
37110 Et assez en a en maison,
37111 Sans vous grever le poëz faire,
37112 Et de la mort le poëz traire.
37113 Et si ferez grant charité.
37114 Beaulx[9] doux pere, ayez pité,
37115 Que il puisse en vie[10] ester. »
37116 De la vint le premier prester.
37117 Et tant prester multiplïa
37118 Qui a usure s’avoya :
37119 Bles et vins, a terme et a temps,
37120 Tant a crëance, tant <a> contens[11].
37121 D’usure fis je les sentiers,
37122 Et avec ce les courretiers,
37123 Et les fis mentir et jurer
37124 Et tous ensemble parjurer,
[102c]
37125 Et leur dit qu’en leur courretage
37126 S’ilz voeullent estre preu et sage,
37127 Souvent gaignier et enbourser
37128 Et avoir assez entourser,
37129 Mettent derrier l’huis charité
37130 Et taisent toute verité.
37131 Et se autrement ilz faisoient,
37132 Envis marchié assouviroient.
37133 Ilz ont bien mon command tenu,
37134 Maintiennent et ont maintenu.
37135 Par ce seront en haut degré
37136 Et je leur en sçay tresbon gré.
37137 Or ay [je] fait aultre bezongne
37138 Que maintes gens de bien eslongne,
37139 Malgré raison et son pooir,
37140 Qui en poeut monlt grant doeul avoir.
37141 J’en eulx vers lui pluseurs batailles,
37142 Lors que je establis les tailles
37143 Que les gentilz homs ores lievent,
37144 Dont monlt forment nature griefvent,
37145 Et dont main preudomme s’esmaie,
37146 Selon ce que il plus en paie.
37147 Gentilz hommes, quoy que l’en die,
37148 Vivent aujourdhuy de tel vie :
37149 Se povres gens ont leur sustance,
37150 Tost ilz leur ostent leur chevance.
37151 Prendent ce qu’ilz ne gaignent mie.
37152 De tel gaignier prendent leur vie,
37153 Dont les povres sont mehaignié.
37154 Et si ne l’ont mie gaignié,
37155 Et le font pour chaté tenir,
37156 Par le longuement maintenir.
37157 Mais [qui] d’aultrui prent la sustance
37158 Et qui lui oste a sa grevance,
37159 Il met s’ame a dampnement[12],
37160 Se cil qui fit Adam ne ment.
37161 Combien que je aye ce fait,
[102d]
37162 Je congnois bien que ce est tort fait :
37163 Bien doit l’Eglise disme avoir,
37164 Ce est proprement son devoir,
37165 Les dismes sont a eulx sans faille.
37166 Cil se meffait qui ne leur baille,
37167 Gentilz homs avoir ne le doivent.
37168 Contre Dieu les disme rechoivent.
37169 Ce est chose esperitïelle,
37170 Gentilz ne doivent tenir celle,
37171 Et Dieu a sa face recreupt
37172 Gentil qui la disme recoeult.
37173 L’Eglise tous dismez avoir
37174 Doit, si comme on poeult sçavoir
37175 Par Adam qui beste gardoit
37176 Qui le .xiije. ou feu ardoit.
37177 Abraham, Ysaac dimes paioient,
37178 Le .xiije. et s’i s’accordoient.
37179 N’estient encor nullez eglises.
37180 Pour ce estoient au feu mises.
37181 Ad ce congnoist on clerement
37182 Que le .xiije. a nul n’avient.
37183 L’Eglise si en fu fondee.
37184 Celle disme lui fu donnee
37185 De ce qu’aloit a dampnement,
37186 Ce fut son premier fondement,
37187 Non mie sur aultrui sustance,
37188 […][13]
37189 Dieu ne voeult mie estre servis
37190 Des biens dont aultre est asservis.
37191 Dieu n’a cure de l’aultrui bien.
37192 Ce qu’il a lui souffit tresbien.
37193 Une aultre ordonnance ay[14] mise,
37194 Qui vault pis que la taille mise.
37195 Au faire[15] ay je mis grant cure.
37196 Et est tout ce contre droiture.
37197 J’establi le formarïage,
37198 Et se nulz sont preudoms ou sage
37199 Pour voir, ilz ne le leveront
37200 N’en nul temps nel recepveront,
[103a]
37201 Car je le fis de ma scïence,
37202 Ou ja preudoms m’ara bëance.
37203 Je le fis a m’intencïon
37204 Pour tollir generacïon,
37205 Ce pour quoy le monde est crëez.
37206 Pour bien ne le feïs, crëez.
37207 Quant Moÿse ala ou dezert,
37208 Mena o lui le poeuple serfs,
37209 Quant des mains Pharaon osta
37210 Et a obeïr les docta.
37211 Riens de obëyr ne sçavoient.
37212 Comme bestes partout alloient,
37213 N’avoient rigle n’ordonnement
37214 Ne tenoient nul commandement.
37215 La fu premier ordre donnee
37216 Et toute ordonnance donnee.
37217 Baillie leur fu ordonnance,
37218 Obeïssance et abstinence.
37219 Firent a Dieu tous noncïon.
37220 Sique il est d’ajunccïon.
37221 Dieu a eulx une voix tramist,
37222 Qui a eulx tous ensenble dist :
37223 « Choisi et prens par bonne amour
37224 Celle qui semblera meillour. »
37225 Cy ot monlt bon commandement,
37226 Sire prestre, certainement.
37227 Il ne dit pas : « Prens la plus riche,
37228 La plus large ne la plus chiche.
37229 Ne celle du plus grant parage,
37230 La plus fole ne la plus age ».
37231 Mais : « Celle ou le tien cœur bee,
37232 S’elle le voeult, te soit donnee.
37233 Et ayez vers lui bonne amour.
37234 C’est la sentence au grant Seignour.
37235 Ung homme une femme amera,
37236 L’ung l’autre monlt desirera,
37237 Et de bon cœur s’entrameroient,
[103b]
37238 Se ensemble adjoustés estoient. »
37239 Ne sont pas d’une merderie
37240 Que on appelle seignourie.
37241 Cellui a celle n’oze tendre,
37242 Ne celle cellui n’oze prendre.
37243 S’ilz s’entreprendent riens ne sont
37244 De plus espoir que ilz n’aront.
37245 Cellui au cœur mal en ara,
37246 Jamais, espoir, femme n’ara,
37247 Espoir, jamais elle mary,
37248 Et chascun ira au hary.
37249 Tous les ans pour cestui usage
37250 En demeurent cent marïage.
37251 Cecy fu fait de ma scïence
37252 Contre Raison et Conscïence.
37253 Raison forment s’en courouça,
37254 Et pluseurs fois m’en maneça.
37255 Disoit qu’oncques preudoms ne sage
37256 Destourba ja bon marïage,
37257 « Les commans de Dieu ne les fais,
37258 Ce pour quoy le siecle fu fais. »
37259 Et je lui<s>[16] dis : « Dame Raison,
37260 Boutés vous en vostre maison.
37261 La vous tenez et vous muchiez
37262 […][17]
37263 Car malgré vous cecy courra.
37264 Or en voit comme aller porra,
37265 Car il sera, soit droit, ou tort.
37266 Je suis plus poissant et plus fort,
37267 Et s’ay plus que vous des amis
37268 Qui bien m’aideront trestoudis.
37269 J’ai mes gentilz hommes a moy
37270 Qui m’aideront sans nul arroy,
37271 Les collieges, les abbaÿes,
37272 Et avec ce les chanonnies
37273 Qui tous seront a mes accords,
37274 Et metteront pour moy leurs corps.
37275 Ja vostre conseil ne sieurront,
[103c]
37276 Pour leurs ames riens n’en feront.
37277 Leur sang et leur challeur menguënt[18],
37278 Et boivent tout quanques ilz suent.
37279 Ce est le chaté gentillesse
37280 Qu’on appelle aujourdhuy noblesse.
37281 Iceulx vivent, soit bel ou gent,
37282 De la despoulle a povre gent,
37283 Pour noblesse auctorisier
37284 Et pour eulx au monde prisier,
37285 Et pour eulx faire plus monter.
37286 Pour les povres plus debouter,
37287 Je fis que leurs homme devindrent
37288 Et les formarïages tindrent.
37289 De ce fis Raison asservir
37290 Pour les gentilz hommes servir.
37291 Tant que l’ont maintenu, <et>[19] hanté
37292 Que il chiet en prosperité,
37293 Et de droit le voeullent avoir.
37294 Mais ilz en venront a Doulloir
37295 Qui est ung mal gars sans pitté.
37296 Raison leur a pieça ditté,
37297 Mais ne leur est de l’advenir.
37298 Du present se voeullent tenir.
37299 Ha ! com present est male beste !
37300 Pluseurs en ce siecle en font feste.
37301 N’y regardent ne bas ne hault,
37302 Ne du futur il ne leur chault
37303 Qui mieulx apartient a doubter,
37304 Que present ne fait a amer.
37305 Le present voit on deffenir,
37306 Mais le futur est a venir.
37307 Des mainsmortes fis ensement,
37308 Dont par ce sont mille truhant,
37309 Et larrons pluseurs aussi sont.
37310 Quant ilz tous leurs biens perdus ont,
37311 Des eglizes et des gentilz,
37312 Lors demeurent povres et vilz,
[103d]
37313 Lors[20] s’enfuient, et vivre convient.
37314 Et lors Desesperance vient.
37315 Pluseurs en sont desconforté
37316 Et pluseurs s’en sont mal porté.
37317 Estre larron et assailleur,
37318 Faulx parjure et faulx plaideur,
37319 Pour ce en sont perdu ung millier
37320 Que seigneurs ont fait essillier,
37321 Qui pour eulx ont prins et tenu
37322 Ce que ilz[21] deussent avoir eü
37323 Par droit naturel loialment,
37324 Selon l’Ancïen Testament.
37325 Or l’ont cilz par Force qui vaint,
37326 Dont Nature et Raison se plaint.
37327 Tant l’ont longuement maintenu,
37328 Qu’en saisine si l’ont tenu,
37329 Malgré Raison et son pourchatz
37330 Qui n’y a pooir ne q’ung chatz.
37331 Eglize et gentilz me soustiennent
37332 Et trestous mes fais entretiennent.
37333 Dient qu’ilz ne poeuent avoir
37334 Chevance ne aucun avoir
37335 Que iceulx ayent qui leur soit.
37336 Quant ung preudoms la mort reçoit,
37337 Qui a tout son temps traveillié,
37338 Juné, espargnié et vieillié,
37339 De ses biens ara retenu,
37340 De quoy doit estre soustenu
37341 Et son corps tenir en santé,
37342 Pour eschever mendicité,
37343 Dieu fera de lui son volloir.
37344 Et pour quoy n’ont ses biens si hoir ?
37345 Sa char, son sanc vient en present.
37346 L’on leur tault, on fait malement.
37347 Qui ma char et mon sang taulra
37348 Ce que mon corps acquis ara,
37349 Pour quoy ara le mien chastel
[104a]
37350 Qui ne me douroit ung morsel ?
37351 Bien honneur faire ne me pense.
37352 Pour quoy ara il ma sustance ?
37353 Ne jamais bien ne lui fera.
37354 Pour quoy donc ses biens ostera ?
37355 Cil qui riens n’est, les voeult avoir
37356 Et herite est, sans estre hoir.
37357 L’autrui sans comment avoir voeult
37358 Et de quel cœur prendre le poeult ?
37359 Comment le poeut riens soustenir,
37360 Quant aultrui sanc voeult retenir ?
37361 Comment ose il l’autrui sanc prendre ?
37362 Comment y ose il la main tendre ?
37363 Tous les maux qu’il a eu acquis,
37364 Ou temps qu’il a ses biens acquis,
37365 Tu emportes ; avec ce es lerres.
37366 Quant de l’autrui bien es tollerres,
37367 Lerres es, et tous les pechiés
37368 As dont il estoit entechiés.
37369 Laisse au filz le sanc du[22] pere.
37370 Qui ne le fait il le compere,
37371 Si comme les ancÿens firent
37372 Qui point d’empeschement n’y mirent.
37373 Lys de Jacob et d’Esaü,
37374 Se leur patrimoine ont eü.
37375 Des ancïennes nacïons,
37376 S’estranges ont <leurs> successïons,
37377 Je ne t’en fais difficulté.
37378 Tout ancïen qui ont esté
37379 Qui congnoissent soient sceü,
37380 Doivent avoir leurs biens eü
37381 Fors puis ung peu de temps en ça,
37382 Que mon art premier le pensa,
37383 Qui leur a affermé de voir.
37384 Ne poeuent meilleur chaté avoir,
37385 Et de ce m’onlt[23] si bien creü
37386 Que bien sont au prendre esmeü.
[104b]
PRESTRE HUNBERT
37387 ― Regnart, deux choses me maintiens
37388 Contraires, et si les soustiens.
37389 Toutes ces œuvres ton art fist,
37390 Et Raison si les contredist.
37391 Dy moy qui premier les trouverent
37392 Et qui les premiers en ouvrerent,
37393 Et par quelz mots dame Raison
37394 Dist qu’il n’estoit ne bel ne bon.
REGNART
37395 ― Sire, du temps que Charlemaine
37396 Estoit roy, qui tant ot de paine,
37397 Ung jour saint Jacquez vint a lui.
37398 En dormant de lui se plaindi,
37399 En dormant dit : « Roy terrïens,
37400 Honnouré sur les ancïens,
37401 Qui tant de terres as conquises
37402 Et a la Crestïenté mises,
37403 Mais[24] une oubliee en as
37404 Ou tu encores esté n’as.
37405 Ce est la terre de Galice,
37406 La ou il a tant de malice.
37407 En celle terre gist mon corpz,
37408 Qui a grant martire fu mors.
37409 La ne est veü ne sceü,
37410 Ne se oncquez n’y fut eü.
37411 Le roy Angoulant le maintient
37412 Qui <la> Crestïenté ville tient.
37413 Des paiens est toute poeuplee[25]
37414 Qui maintiennent celle contree.
37415 Fay tant que mon corpz soit requis
37416 Et le sauvement des bons quis.
37417 Or va acquittier le passage
37418 Et si fay le pelerinage.
37419 Pluseurs sauver la se porront,
37420 Dieu et les bons gré t’en sçaront.
37421 De ce plus ne te parleray.
[104c]
37422 Au Dieu plaizir, je t’aideray. »
37423 Charlemaine s’est esveillié.
37424 De ce s’est forment merveillié.
37425 A la parole monlt pensa.
37426 Ses princes devant lui manda.
37427 La parole leur a comptee
37428 Que l’apostle lui a dittee.
37429 Lors chartres et briefz fist escripre.
37430 Manda gens en France, en l’Empire,
37431 Que trestous venissent briefment
37432 Pour oÿr son commandement,
37433 Et a tous leurs a maintenu.
37434 Monlt tresgrant poeuple y est venu,
37435 Que en Espaigne voeult mouvoir
37436 Sans temps ne sans respit avoir :
37437 « Or verrons que de cœur venrra,
37438 Qui pour Dieu le chemin prenra
37439 Et qui se vouldra delivrer
37440 De ce saint passage acquitter.
37441 Cilz qui volentiers y venra
37442 Son saulvement y acquerra.
37443 Qui[26] Dieu ayme a lui se tiengne.
37444 Qui[27] m’aime aprez moy [s’en] viengne. »
37445 Maintz en y ot de courouchiez
37446 Assez plus qui n’y ot de liez
37447 Qui mieulx aymassent demourer
37448 Que en Espaigne cheminer.
37449 Tout ainsi que l’ost cheminoit
37450 Et es vallees se tenoit,
37451 Et tout l’ost se fust adonc mis
37452 Ou Prouvins si est ore assis.
37453 Il n’y avoit chateau ne ville
37454 Mais valee[28], ort lieu et vile,
37455 Montaignes, vallees[29], oscurs lieux
37456 Sans habitacïon et seulx.
37457 Mal lieu y avoit et despers.
37458 Monlt bien sembloit lieu de desers.
[104d]
37459 Plain fu de fumee et d’oultrages.
37460 Monlt y avoit bestes sauvages,
37461 Envenimeuzes et cuisans,
37462 Et dragons et oiseaulx nuisans.
37463 Apremont nommer le solloient
37464 Ceulx[30] qui anciennement vivoient,
37465 Lieu plain de toute obscurté[31]
37466 Et de toute maleureté.
37467 Apremont alors dit estoit.
37468 Habitacïon n’y avoit.
37469 La furent pluseurs establi
37470 Pluseurs[32] se tenoient coaty,
37471 Et cuidoient estre en esture.
37472 Les pluseurs n’orent d’aller cure,
37473 Mais en ce lieu monlt s’esbahirent.
37474 Quant le roy et sa gent ce virent,
37475 Lors fist le roy communement
37476 Crïer partout generalment :
37477 « Quiconcquez demourer[33] volra,
37478 Sa demeure faire y porra
37479 Par si que seront serfs clamés
37480 Et en servitude clamés.
37481 Doresenavant treu paieront
37482 De tous les biens que ilz aront
37483 Et de meubles et d’heritages
37484 Paieront tailles et treuages.
37485 Trestous qui ceulx cy demouront,
37486 De tous leurs biens treu paieront
37487 Trestous les ans sans delayer. »
37488 Ung aultre cry refist crïer,
37489 Que trestous ceulx de male vye
37490 Et qui vivent de houllerye,
37491 De jeux de dez, de jeux de tables
37492 […][34]
37493 Que point aprez l’ost ilz n’alaissent,
37494 Mais tous arriere demouraissent,
37495 Car les vivres vont degastant
37496 Et si ne vont riens proffitant.
[105a]
37497 Et il est pechié du mener
37498 Et encores plus d’eulx donner
37499 Et leur pechié poeult aultrui nuire.
37500 Pour ce est bon eulx du tout fuir.
37501 Adonc se trairent d’une part
37502 Plus de seize mille couart,
37503 Et dient que avant n’yront,
37504 Mais arrier s’en retourneront,
37505 Car il n’ot en eulx qu’esmaier.
37506 Mieulx ayment leur taille paier,
37507 Car au corps gaigneront l’avoir.
37508 Pour ce voeullent le remanoir,
37509 Non mie morir en langour.
37510 Et Charlemaine sans demour
37511 Les condempna sans delayer
37512 A chascun an taille paier.
37513 Et sur ice s’en retournerrent.
37514 Putains et houlliers demourerent,
37515 Ribauds et les joueurs de des,
37516 Illec furent logiés es pres,
37517 Et dirent illec se tenront.
37518 Illec Charlemaine attendront.
37519 La le chateau de Prouvins firent,
37520 Les premieres pierres y mirent,
37521 Et adés demourerent la.
37522 Et le roy Charles s’en ala.
37523 Mais grans ans en Espaigne sist.
37524 Je ne vous diray pas qu’il fist,
37525 Car cy devant veü l’avez
37526 Et ses œuvres bien le sçavez,
37527 Et des grans conquestes qu’il fist
37528 Tant comme en Espaigne sist,
37529 Cy devant vous sont devisé,
37530 Se vous y avez bien visé.
37531 Mais a chief de sa queste vint,
37532 Et par illecques s’en revint.
37533 La ou n’avoit qu’une vallee,
[105b]
37534 Une ville y a trouvee.
37535 Lors demanda : « Comment poeut estre ?
37536 Quand nous passames par cest estre,
37537 N’y avoit ne piller ne bourne :
37538 Or y a grosse ville et bonne. »
37539 Lors sa maisnie lui a dit :
37540 « Sire, souviengn<i>e[35] vous du dit
37541 Que toutes gens de maise vie
37542 Ne sieuissent vo compagnie ?
37543 Dix mille en furent detrïé,
37544 Qui ce lieu ont ediffïé. »
37545 Dist le roy : « Cilz ont bien ouvré,
37546 Et par Dieu bien s’i son prouvé. »
37547 Et pour cest mot, Prouvins ot nom.
37548 Prouvins ester de grant renom,
37549 Quant histoires cerchier voulrez,
37550 Trestout cecy y trouverez.
37551 De la vindrent tailles premiers
37552 Et au roy et aulx chevaliers,
37553 Et aulx eglizes et aulx aultres,
37554 Tant sont allez lances sur faultres,
37555 Et par mon art et par ma vie,
37556 Qu’ilz ont tout mis a une vie.
37557 A trestous les font paier taille,
37558 Bon et malvais, vaille que vaille.
37559 Par[36] moy en saisine en sont.
37560 Or garde bien comment ilz font,
37561 Comment joÿssent par usage
37562 De mainmorte et formarïage.
37563 De Bourgongne premierement[37] vint.
37564 Bourgongne primes le maintint,
37565 Et par Bourgongne le scet on.
37566 Ung chevalier qu’ot nom Othon
37567 Bien trente feus soubz lui tenoit
37568 Ne nulle aultre choze n’avoit.
37569 Le duc servoit pour ses despens.
[105c]
37570 Si advint des icellui temps,
37571 Les hommes qui tous sont mortelz,
37572 Que en l’un des iceulx hostelz
37573 La[38] femme a mort devïa,
37574 Et le mary se marïa
37575 A une aultre femme voisine
37576 Qui n’estoit pas de celle orine,
37577 Ains soubz l’evesque demouroit,
37578 Et l’homme homs Othon estoit.
37579 L’homme quant soubz l’evesque vint,
37580 L’evesque tout pour sien le tint,
37581 Et si le mist en ses escrips.
37582 Et pour ce monta li escris.
37583 Othon quancquez cilz ot sus lui
37584 A tout aproprié a lui.
37585 Et dist cil : « Mon homme sçavoit
37586 Que marïer ne se pouoit
37587 N’en aultre seignourie manoir :
37588 Pour ce perdera son avoir. »
37589 Pour ce disoit avoir acquis
37590 Quancques il avoit sur lui mis.
37591 Lors maintint Raison le contraire
37592 Et dit que bien le pooit faire,
37593 Que homs use d’auctorité
37594 Avec de liberalité.
37595 Liberaulx e[s]t, liberaulx vit,
37596 Et liberaulment se chevist
37597 En tel cas pour son volloir faire.
37598 Nul n’en doit aller au contraire.
37599 A maistrïer a nullui n’est,
37600 En tel cas de lui sires est.
37601 De lui destrourner n’a pooir,
37602 Se la force n’en voeult avoir,
37603 Et force n’est mie raison
37604 S’il n’y a male mesproison,
37605 Mais cil qui force l’en fera,
37606 Contre Dieu monlt se meffera,
[105d]
37607 Ostera liberalité,
37608 Seignourie ou[39] charité.
37609 Ne nul ne poeut sans lui meffaire,
37610 Marïage en amour deffaire.
37611 « De son corps sire vous clamez
37612 Nourry n’alevé ne l’avez.
37613 Pour quoy le voulez maistrïer ?
37614 A quel cause vous doit prisïer ?
37615 N’est il aussi bons com vous estes,
37616 De cors, de bras, de cœur, de testes ?
37617 Comme vous est il d’Adam nez ?
37618 Quelle chose lui demandez ?
37619 Se tous deux estiez en ung plain,
37620 Ne lui porriez oster son pain,
37621 Car il est com vous couronnez.
37622 Pour quoy nul trouble lui donnez ?
37623 N’a il de Dieu l’auctorité
37624 D’user de franche voulenté,
37625 Et vous aussi com lui de franche ?
37626 Quel droit avez vous donc en ce ?[40]
37627 Pour quel cause vous doit prisier ?
37628 Pour quoy le voullez desprisier ?
37629 Se vous marïez, se voulez,
37630 Ainsi en riens subgiet serez,
37631 Ne lui en vous ne vous on sien,
37632 En lui n’avez aucune rien.
37633 Ne fustes vous pas nez d’un pere ?
37634 Ne fu pas Eve vostre mere ?
37635 Quel droit par dessus lui avez ?
37636 Si m’ayde Dieu, vous ne sçavez,
37637 Fors seulement vo force acquise,
37638 Ou avez vostre entente mise.
37639 Se force acquize vous n’aviez,
37640 Contre lui riens vous ne sçariez,
37641 Et se force acquise eüst[41],
37642 Par dessus vous trestout peüst,
37643 Car vous n’estes tant seullement
[106a]
37644 Fors par le force d’aultrui gent.
37645 Et touteffois que cilz vorront,
37646 La leur force vous osteront.
37647 Si demourriez tout seulx come eulx,
37648 Et se il avoit sens en eulx,
37649 Ceste[42] force ilz acquerroient
37650 Et feroient tant qu’ilz l’aroient.
37651 Non aroient mais celle aÿde
37652 Qui encontre eulx si vous aÿde.
37653 Doncques estes vous par ingal,
37654 Pour ce ne lui faites nul mal,
37655 Ne le reprenez ne lui vous.
37656 Ainsi a droit chevirés vous. »
37657 Lors fu Raison vielle clamee
37658 Que mal s’estoit si main levee
37659 Que ja creüe n’en sera.
37660 Le paÿsant l’amendera.
37661 Mal a fait contre mon volloir
37662 Il en venra a grant dolloir.
37663 Se l’evesque n’y fust aidans
37664 Je lui feisse traire les dans.
37665 Lors les gentilz plains de mon art
37666 Se traïrent tous d’une part.
37667 Dirent : « Deceüs trop seriesmes
37668 Se nos hommes ainsi perdiesmes,
37669 Que par force acquis avons.
37670 Ne revengier ne nous sçavons
37671 Encontre Raison et sa gent
37672 Qui est contre nous monlt souvent.
37673 Comment qu’il soit par force allons,
37674 Ne ja Raison nous n’en ferons :
37675 Ung chascun se marïeroit,
37676 Ains<i> chascun nous deffiëroit,
37677 Lors deveriesmes mendïans,
37678 Et vilains, gras, liez et joians.
37679 Or chatïons bien ce vilain
37680 Que chascun voise en son pelain,
[106b]
37681 Et que trestous exemple y prengnent
37682 Siqu’a obeïssance viennent.
37683 Car se nous point Raison crëons,
37684 Tous deherités nous serons,
37685 Et le derrain si clorra l’huis. »
37686 Lors dit chascun : « A l’acord suis ! »
37687 Par mon conseil fu Raison mate,
37688 Encor suis d’acord qu’on le bate.
37689 De la vint le formarïage,
37690 Et des mainmortes ly usage.
37691 Aprez je basty allïances
37692 Et les malvaizes deffïances.
37693 Lors fis je faire les haubers
37694 Et les chevaulx de fers couvers.
37695 Je fis villains en l’ost aller
37696 Pour eulx les premiers appeler.
37697 Or ay je fait aultres devises.
37698 Justice fay tenir Eglizes,
37699 Prendre, traïner et banir,
37700 Mairies, prevostés tenir.
37701 Que Raison ne vouloit entendre
37702 Que Eglize fist homme pendre.
37703 Qui consent homme a mort aller
37704 Pour voir, il est irregulier.
37705 Combien que [voir] ilz aulx folz dient
37706 Que la gent ne pendent n’ochient :
37707 « Ce sont nos prevotz et no maire.
37708 Ce ne faisons nous mie faire. »
37709 S’ilz font aulx gens ou tort ou droit,
37710 Bien en conviengne la endroit.
37711 De quelz parolles usent ilz ?
37712 De qui auctorité font cilz ?
37713 Qui les y met ? Qui les soustient ?
37714 Et qui en leurs fais les maintient ?
37715 A qui est l’acquet que ilz gaignent,
37716 Quant aucun pendent ou mehaignent ?
37717 Et si sont payés, bien le dis,
[106c]
37718 Du proppre argent du Crucefix.
37719 Ores poeult on vëoir ce fait,
37720 Je m’en tais pour ce que l’ay fait.
37721 Encor ay je fait meilleur cure :
37722 J’establi prester a usure
37723 Sur lettre, sur gage, aultrement,
37724 Par le paÿs communement.
37725 Tant ay fait courre ce mestier
37726 Que chascun s’en scet bien aidier.
37727 Et si fis morir a hachie
37728 Ung vilain plain de male vie
37729 Que on appeloit Bonne Foy,
37730 Qu’il n’y avoit nullui que moy.
37731 Pitié, sa femme, morir fis,
37732 Et Charité en prison mis,
37733 En prison juree, ce[43] sachiés,
37734 Ne jamais n’en sera saquiés.
37735 Et, pour voir, cellui Charité
37736 Ay je trestout desherité.
37737 Povres est et despourveüs,
37738 En peu de lieux est mais veüs.
37739 On ne le voit mais, se peu non.
37740 N’est plus memore de son nom.
37741 Or est en fuitte et si sera,
37742 Envis jamais il regnera,
37743 Se n’est aucuns des aprentis
37744 Qui sont un peu de ses amis.
37745 Mais ne m’en chault, il n’en est guere
37746 Ne je n’ay cure qu’on les quiere.
37747 Mais Humblesse ne hay je mie,
37748 C’est ce qui me donne ma vie.
37749 Fault Semblant, Constrainte, Abstinence,
37750 C’est ce qui me donne chevance.
37751 Ung jeu fis qui bien s’est prouvés :
37752 Devant Troye la Grant fut trouvés,
37753 Jeux de dez et de merelliers.
37754 Pluseurs en sont bons escolliers.
[106d]
37755 Mais qui mieulx en scet la scïence,
37756 C’est cellui qui a peu chevance.
37757 Advocatz refis je venir
37758 Pour les querelles contenir.
37759 Ce sont les miens meilleurs amy.
37760 Ce sont ceulx qui tiennent de my.
37761 Pour ung cent ont desherité
37762 Que Raison n’a point racheté.
37763 Magicque fut ore perdue
37764 Se par eulx ne fut soustenue,
37765 N’ilz ne se voeullent advertir
37766 Pour nullui qu’ilz voient morir.
37767 Tant leur a <on>[44] monstré a ung fais,
37768 Qu’ilz scevent plus que je ne fais.
37769 En court et en long ilz sont maistre,
37770 Sans eulx ne puis ne [ne] doy[45] estre.
37771 Je establi les curratiers
37772 Qui maintiennent pluseurz sentiers.
37773 Cilz disnent souvent a ma table,
37774 Pour ce qu’ilz sont tous plains de fable.
37775 Ils sont cousins aulx menestreux.
37776 Ensemble s’en vont deux a deux.
37777 Curratiers scevent maintz barats.
37778 Maintz bons preudommes ont fait las.
37779 Ne leur en chault mie gramment,
37780 Qui voit ou arriere ou avant.
37781 J’ay une aultre gent establie,
37782 Qui sont de la jolye vye,
37783 Qui aulx menestreux resont frere,
37784 Et furent engenrez d’un pere
37785 Et d’une meïsme nature.
37786 Florum est le dieu de luxure,
37787 Pour ce les a il tous en cure,
37788 […][46]
37789 Charmiers sont iceulx appelés
37790 Que je ay d’enffer ramenés,
37791 Dont Florum le deable jolis
37792 Pour lui seront ensevelis,
[107a]
37793 Et Florum est le dieu d’Amours
37794 Qui en enfer se vest de flours.
37795 Aprez j’ay asservi denrrees
37796 Qui sont par les foires trouvees
37797 Que on appelloit francement.
37798 Chascun vendoit a son tallent.
37799 J’establi aux terres terrages,
37800 Les coustumes et les servages.
37801 Pour ce que ceulx qui les tenront
37802 Tout malgré Raison les prendront,
37803 Et ceulx qui les ont tellement
37804 Ne poeuent tenir longuement,
37805 Pour ce que c’est de mon chaté
37806 Selon droitte[47] auctorité.
37807 Quicuncques mon chaté prendra,
37808 Longuement tenir ne porra.
37809 Et maint diroient que si fait,
37810 Si com Eglize tout a fait.
37811 Qui mainmortes et marïages
37812 Mettent trestous en leurs usages,
37813 Puis dïent : « Vous vëés clerement
37814 Que nous les tenons longuement.
37815 S’a nous ne deussent[48] advenir,
37816 Longues ne les peussions tenir.
37817 Se de bon chaté ce ne feust,
37818 Tant a nous esté il n’eüst.
37819 Doncques voit on par verité
37820 Que tel gaaing est de bon chaté,
37821 Car se tel gaing Dieu n’envoiast,
37822 Tel gaignement ne nous durast.
37823 Or nous dure, donc a Dieu plaist,
37824 Et pour ce perdre il ne nous plaist. »
37825 Non, non, telle response est bonne.
37826 Tu vas hors voye, et lais la bourne.
37827 Or entens bien la verité,
37828 Tu[49] qui par tel superfluité
37829 Emprens et as devers toy mise,
[107b]
37830 Et tu dis que c’est pour l’Eglise.
37831 Premier, de l’autrui Dieu n’a cure :
37832 Voeult gaing de conscïence pure.
37833 Se tu lui oste d’une part,
37834 Tant est moins servir d’aultre part.
37835 Se les aultrui biens tu retiens,
37836 Trestous ceulx de qui tu les tiens
37837 S’en tiennent vers Dieu moins tenu,
37838 Et plus a tart a Dieu venu.
37839 Dieu en delaissent a prïer,
37840 A loer et a gracïer,
37841 Pour voir si tenus n’y sont mye,
37842 Et se ilz tenissent leur vye,
37843 Les moeubles et leurs heritages
37844 Que tu leur ostes que non sages.
37845 Ainsi en perdant Dieu oublient,
37846 En plusieurs vanités se lient.
37847 Et tu chantes de leur sustance !
37848 Amis, je te pry, bien y pense :
37849 Se Dieu ton chant ayme et prise,
37850 Quant le bon homme ainsi desprise
37851 Et de ce lui voeulx chant chanter,
37852 Dont il est au desconforter,
37853 Il en pleure, et tu en chantes.
37854 Ja de tel chant tu ne te vantes.
37855 Encor du chaté pas n’es mie.
37856 Tu n’y as que ta povre vie.
37857 Nulz de tes hoirs point ne l’ara.
37858 Mais le pechié tien en sera
37859 Qui y aras la paine mise,
37860 Car tu n’ez pas hors de l’Eglize.
37861 Ce gaaing peu te dur[er]a,
37862 Mais <a>[50] l’ame multipliera.
37863 Et le proffit qu’en devra naistre
37864 Sera a ceulx qui devra estre,
37865 Non pas a toy qu’as retenu,
37866 Mais a ceulx dont il est venu,
[107c]
37867 Car adez l’Eglize sera
37868 Qui adez gueredom souldra
37869 Des biens qu’elle ara recheüs
37870 A ceulx qui y seront eüs,
37871 Et a ceulx dont yssus seront.
37872 Iceulx les biens en recheveront[51],
37873 Non point tu qui prins les aras,
37874 Qui espoir en paine en seras,
37875 Car l’Eglize riens n’en retient
37876 Des biens que elle d’aultrui tient,
37877 Mais les rent tost sans respiter,
37878 Car d’aultrui bien el n’a mestier.
37879 Ne se vante nulz d’asservir
37880 Aultrui pour l’Eglise servir,
37881 Car les biens point ne demouront[52]
37882 A lui, mais a ceulx cui seront.
37883 Et cil en sera decheüs
37884 Qui prins les a et recheüs
37885 Car Dieu est juste, tout pour voir,
37886 Qui rent a chascun son devoir.
37887 Pour ce ne demeurent n’affierent
37888 Nulz biens a ceulx qui les acquierent.
37889 Mais en demeurent decheü
37890 Car sont a ceulx cui sont eü
37891 Mon chaté est de tel nature :
37892 Assez tost fait et petit dure.
37893 Folz est qui mon chaté acquiert,
37894 Ne en mes richesses se fiert.
37895 En la fin se repentira
37896 Qui sur mes richesses ira.
37897 Je n’ay a nullui contenchon
37898 De tous mes fais, fors a Raison.
37899 En tous temps elle me coeurt seure.
37900 Pour ce, ne l’ameray nulle heure.
37901 Pour moy fu cecy tout trouvé.
37902 Or vëez se j’ai bien ouvré.
37903 Trestout vint primes en Bourgongne,
[107d]
37904 Et puis si failli en Chanpaigne
37905 Tant le hantent et ont hanté
37906 Qu’ilz se tiennent pour droit chaté.
37907 Partout le font multiplïer
37908 Ne l’ont mais tallent d’oublïer.
37909 Raison s’en est monlt debatue,
37910 Mais jamais n’en sera creüe,
37911 Encor aultre chose establi
37912 Que on ne met pas en oubli,
37913 Que j’ay pour mes gentilz trouvee,
37914 Que vilains leur doivent corvee
37915 Par toutes [les] quatre saisons,
37916 Malgré en ait eü Raisons
37917 Qui disoit c’estoit grant dolour
37918 Laissier sa chose pour la lour.
37919 Tu laisses ta bonne saison
37920 Contre droit et contre raison,
37921 Tu vas estudier pour ayer,
37922 Tu pers le tien pour lui aidier.
37923 Gré ne t’en scet, mais t’en viltoye.
37924 Lors dit Raison qu’alast sa voye,
37925 Que pour lui on n’en feroit plus.
37926 Celle s’en tait qui ne pot plus.
37927 J’ay fait serves condicïons
37928 Que toutes les religïons
37929 Et les gentilz avec les tiennent.
37930 Que tout quanqu’ilz ont a eulx viennent.
37931 Trestout quancquez ilz ont acquis,
37932 Iceulx mors, ilz sont trestout pris.
37933 N’y a frere, sœur ne parent,
37934 Qui en est vaillant ung harenc.
37935 Ceste chose est assez prouvee
37936 Que c’est chose mal controuvee.
37937 La ou oncquez riens mis n’aray,
37938 Sans moi laissier je le tenray,
37939 Dont Raison dit en audïence :
37940 « Qui poeut donner ceste semence,
[108a]
37941 Que ce qui riens ne m’a cousté
37942 Qui ne vient pas de mon costé
37943 N’oncquez mais veü ne l’aray,
37944 A quel cause le prenderay ?
37945 Il ne doit ne [ne][53] m’appartient,
37946 De moy ne des miens riens ne tient
37947 N’a moy ne meffit tost ne tart.
37948 Pour quoy en sont si hoir bastart ?
37949 Comment poeut il a moy venir ?
37950 Comment le puis je retenir ?
37951 Par Cellui qui tous bien crëa !
37952 C’est force, aultre cause n’y a.
37953 Et cil qui tel chaté maintient,
37954 A grant meschief leur ame vient,
37955 Et volentiers l’amenderoient
37956 S’arriere revenir pooient,
37957 La ou nulle riens je n’ay mis.
37958 Et je voy plourer les amis
37959 Et le sanc qui leur sanc requiert.
37960 Nature Nature requiert :
37961 Comment doy je donc a Nature
37962 Oster sa propre nourreture ?
37963 De son sanc suis, et il du mien :
37964 Pour quoy son sanc ne sera mien
37965 Qui oster [doncques] le me poeult,
37966 Et qui a le me oster s’esmoeut ?
37967 Comment doncquez demander l’ose
37968 Qui y a moins que nulle chose ? »
37969 Lors lui dis je : « Dame Raison,
37970 Vostre dit n’est pas en saison.
37971 Du parler vous tenez en paix.
37972 Ainsi sera, n’en parlés mais. »
37973 Si fis je une aultre marchandise
37974 Qui jadis fu a moy commise ?
37975 Le quens de Champaigne ot deffault.
37976 Pour ce me dit : « Argent me fault.
37977 Quatre vingz mille livres quier
[108b]
37978 Dont j’avoye tresbon mestier. »
37979 Le roy Loÿs que on dit saint,
37980 [Et] lequel ne crëoit pas maint,
37981 Lui presta icellui argent
37982 Mais gage en bailla bel et gent
37983 Dont monlt Champaigne en avilla.
37984 Trentre trois fiefs lui en bailla
37985 En gage pour l’argent ravoir
37986 Dont il ne fist mie sçavoir.
37987 Et certain jour ravoir les poeult.
37988 Le conte fist bien ce qu’il doeut,
37989 Car ung mois aprez s’avoia,
37990 Et ses deniers lui renvoia.
37991 Mais ne trouva qui les preïst.
37992 Pour ce convint qu’il les meïst
37993 En gage a Paris en repost,
37994 Car le Roy prendre ne les volt.
37995 Encores les deniers la sont,
37996 Mais les fiefs pas rendus ne sont.
37997 Et quant la mort celluy roy tint
37998 Phelippe Hardy a lui vint,
37999 Dist : « Beau pere, le quens vous proye
38000 Que vous recepvez sa monnoye.
38001 Et que vous ses fiefs lui rendez.
38002 ― Beaul filz, dist il, a quoy tendez ?
38003 ― Je vous fay cecy a sçavoir
38004 Se il poeut ja ses fiefs ravoir,
38005 Et il vous voeult esmouvoir guerre,
38006 Il vous menra a perdre terre
38007 Et encontre lui ne durrez.
38008 Or en faittes ce que volrez. »
38009 Philippe[54] en tel point se tint
38010 Que les fiefs et l’argent retint.
38011 Je ne les laissié oncquez rendre.
38012 Or poeut le quens assez atendre.
38013 Tant ay fait le fait delayer
38014 Que tout est mis a oublïer.
[108c]
38015 Iceulx sont mors qu’il l’ont sceü.
38016 Cui il n’en chault se sont teü.
38017 Chascun s’en tait et je m’en tais.
38018 Je m’en dois bien tenir en paix.
38019 Le premier qui oncquez tendi
38020 Ad ce que prevostés vendi,
38021 Oncques vendu n’orent esté,
38022 Quant je par mon art l’ennorté :
38023 Vendis prevostés et mairies
38024 Qui ne sont point encor taries.
38025 Encor les vent on en present.
38026 Mais ce fay je certainement,
38027 Si lui dis je pour acquerir,
38028 Primes disiesmes requerir.
38029 Le premier diziesme rechupt :
38030 Ne sçay se le Pappe dechut
38031 Ne se le roi[55] fut decheüs
38032 Oncques roy ne les ot eüs.
38033 Et si lui fis trestout de voir
38034 Primes les regalles avoir.
38035 Le regalle print, n’eust esté,
38036 C’est esperitualité.
38037 Raison disoit, selon la lettre,
38038 Que nul lay ne doit la main mettre
38039 Tout ce qu’a Eglize appartient
38040 Et tout ce que d’Eglize tient.
38041 Raison s’en debaty assez,
38042 Mais tost fu son debat cassez.
38043 Aussi prinst il premierement
38044 Malgré Raison et son convent
38045 Que Raison ne poeut retarder
38046 Deniers d’abbaÿe a garder
38047 Qui toutes sont dessoubz sa main
38048 Couchans et levans, soir et main.
38049 C’est ly argent du Crucefix,
38050 Et si n’y met ung parisis,
38051 Il ne met nëant au garder.
[108d]
38052 Nul n’y oseroit contrester,
38053 Et pour ce, pas moins ne lui chiet
38054 Grand amende quant elle eschiet.
38055 Tout cecy ay fait ou fait faire.
38056 Par Dieu, je ne m’en doy pas taire.
38057 Je le doy bien ramentevoir,
38058 Car il a valu maint avoir
38059 Et au temps advenir vaulra.
38060 Car mais des mois il ne faulra.
38061 Bon procureur fusse[56] eüs,
38062 Se le roy m’eust bien pourveüs,
38063 Je lui amenasse bon pain,
38064 Souventeffois et soir et main.
38065 Mais Nicolas Cholés ne daigne,
38066 Son grant procureur en Champagne[57],
38067 Qui m’en a du tout debouté.
38068 Mais volentiers l’eüsse esté.
38069 Il a juré qu’il le sera,
38070 Et que ja pour bien n’y fera.
38071 Et il fera a son pooir
38072 Qu’il acquerra tresgrant avoir.
38073 N’aultre de lui n’en sera mie,
38074 Tant que Dieu doint a Philipe[58] vie,
38075 Se Raison ne lui nuit avant,
38076 Qui mont parle de lui souvent.
38077 Or attendray ce que doit estre
38078 Tant que Cholés truisse son maistre.
38079 Plus que tant ay or attendu,
38080 Et toudis ay mon arc tendu
38081 Pour traire la ou je porray,
38082 Jusques m’entencïon aray.
38083 Or ay une aultre chose fait
38084 Que jamais ne sera deffait
38085 Au contraire de povre gent,
38086 Qui vault chascun an maint argent.
38087 Gentilz hommes et abbaÿes
38088 Ne s’en tiennent point esbahies :
[109a]
38089 Maint denier chascun an il vault
38090 Et tout paier au povre fault.
38091 Abbaÿes ne chevalier
38092 Ne paieront point ung denier.
38093 Je fis sur les possessïons,
38094 Terres, vignes, prez et maisons,
38095 Les saisines perpetuelz
38096 Et y mis servitudes telz
38097 Que toutes fois que on les vent
38098 Soit ou long terme, ou souvent,
38099 Je fay la au seigneur paier
38100 De chascun vingt sols sans targier,
38101 S’il ne le scet tresbien debatre,
38102 Pour les ventes, trois solz ou quatre,
38103 Ce est le sixiesme denier.
38104 Pour ce ne demeure a paier
38105 Celle saisine tous les ans.
38106 Or vëez donc comme est dollans
38107 Et combien se doit esmaier
38108 Car il convient cecy paier,
38109 Car cellui qui riens n’y a mis
38110 Ne oncquez ne fut ses amis,
38111 Ne honneur, ne bien ne lui dist,
38112 Ne oncques proffit ne lui fist
38113 Ne neant ne le deporteroit
38114 Ne pour lui riens il ne feroit.
38115 Et si a le quint de son bien,
38116 Raison dit que il n’est pas sien,
38117 Car elle dit : « Nul ne doit prendre
38118 N’a nulle chose la main tendre
38119 S’il ne l’a par loial labour,
38120 Par charité et par amour.
38121 ― A quel cause doncques ara
38122 Le mien qui gré ne m’en sçara
38123 Et qui ne l’a point desservi ? »
38124 Raison n’accorde point cecy
38125 Mais malgré lui il est passé
[109b]
38126 Et trestout son voloir cassé.
38127 Or en ait elle le mal gré.
38128 Encor ay fait aultre decré :
38129 Com preudoms et lëaulx et sages,
38130 Je ay acoustumé terages
38131 De dix garbes l’une paier.
38132 Or se poeuent bien esmaier,
38133 Et si n’en facent ja dangier.
38134 Ne poeuent sans le teragier
38135 Dessus le camp le blé oster
38136 Qu’on ne leur feïst rapoter !
38137 Or vëez comment se maintiennent
38138 Povres gens qui telz terres tiennent !
38139 Ont ilz assez de povretés,
38140 De grans paines et de durtés !
38141 Encor s’aultre mal ilz n’eusissent,
38142 Souffisanment ilz se chevissent.
38143 Mais je qui ne les voeulx amer
38144 Et qui les voeulx tous debouter,
38145 Et qui leur ay fait maintes guerres,
38146 Je ay fait mettre sur leurs terres,
38147 Sur les prez et sur leurs maisons,
38148 Sur leurs mes et sur leurs cloisons,
38149 Je qui en nul tempz ne les aim,
38150 Car gelines et blé et pain
38151 Chascun an paie par coustume,
38152 Siques quant ly ung moeurt ou tume,
38153 Ou que sans hoir se doit morir,
38154 Il pert tout, dont poeut ce venir
38155 Que ja ses hoirs riens n’en aront,
38156 Et trestous privés en seront,
38157 Et toutes ces choses aront
38158 Ceulx qui ja gré ne l’en sçaront.
38159 Mais d’une chose esbahis suis
38160 Que tant grever je ne les puis
38161 Que ilz ne les voeullent amer,
38162 S’ilz leur faisoient le cœur crever
[109c]
38163 Et chascun jour les traïnaissent,
38164 Que les vilains ne les aimaissent.
38165 Les criemment et <leur>[59] portent honneur,
38166 Et les appellent : « Monseigneur ! »
38167 Du leur n’endurent pas a traire,
38168 Ne ne s’endurent a bien faire,
38169 Ainçois vivent monlt povrement,
38170 Vestent, chaussent monlt povrement.
38171 Du tout se voeullent abaissier
38172 Pour leurs seigneurz leurz biens laissier,
38173 Et cilz ne douroient pas d’aulx,
38174 Ne de leurs corps deux paniers d’aulx,
38175 Mais les vituperent et fuient,
38176 Et les meschans villains les suient,
38177 Honneurent et font honnourer
38178 Ceulx qui les voeullent ahonter.
38179 Doit on bien haïr telz vilains
38180 (Par le vray Dieu, point ne les aims),
38181 Qui eulx et leurs hoirs desheritent
38182 Pour ceulx qui tousjourz les debitent
38183 Qui ne leur poeullent trop mal voir ?
38184 Sire prestre, ne dy je voir,
38185 Quant se voeullent deshonnourer,
38186 Pour iceulx seigneurs honnorer
38187 Et croy se les dens leur traioient
38188 Que les vilains les aimeroient ?
38189 Car point de congnoissance ilz n’ont,
38190 De voir, qu’ilz sont homs come ilz sont.
38191 Pour riens que sachent despiser,
38192 Ilz ne se voeullent adviser
38193 Pour parole ne pour despit
38194 Ne pour chose que on leur dit
38195 Que la dame de Doche ait fait,
38196 Qui fit oster trestout de fait
38197 Une femme de terre hors
38198 (Six jours y ot esté son corps),
38199 Pour ce qu’aucun lui fu comptans
[109d]
38200 Que la femme avoit en son temps
38201 Quinze aunes de toille fillee
38202 Dont elle estoit envelopee
38203 Et en quoy fut ensevelie.
38204 La dame dit : « Ne me plait mie
38205 Que tel vilaine ait dedens terre
38206 Ma toille ; or[60] le m’alés querre.
38207 Quancques elle avoit estoit mien,
38208 Nul bien qu’elle[61] eüst n’estoit sien. »
38209 Lors fist la fosse desserrer
38210 Et celle femme desterrer.
38211 D’entour elle la toille osta,
38212 Le corps arrier ens rebouta,
38213 Comme eüst une beste fait.
38214 En l’an mil .iijc. ce fut fait,
38215 Que la dame ce fait emprist.
38216 De celle toille couvrir fist
38217 Ses trois chevaulx pour la chalour.
38218 Or vëez se ce fust vallour :
38219 Oncques vilains n’y regarderent,
38220 Mais plus l’amerent et doubterent.
38221 Sires prestre, ne quiers celler :
38222 Telz gens font petit a amer.
PRESTRE HUNBERT
38223 ― Par foy, Regnart, monlt me merveil.
38224 De toy ne vis oncques pareil.
38225 Tu as si gentillesse amee,
38226 Maintes leurs maisons as fermee
38227 Et de la sustance d’aultrui,
38228 Que s’oncques les fais Dieu congnui
38229 Tu en seras d’enffer es joings,
38230 Et ilz n’en reseront pas loingz.
38231 Tu leur as donné les richesses,
38232 Et les aizes, et les noblesses,
38233 Et les plentés, et les ayeues,
38234 Que tu as aulx aultres tollues.
38235 Or sont en aize et en honneur,
[110a]
38236 Et cilz en sont a deshonneur
38237 Et en tiennent les grans franchises
38238 Que tu as sur povres gens prises.
38239 ― Sire prestre, or[62] me crëez,
38240 Car, se bien vous cler y vëez,
38241 Ilz sont plus serf que toute gent
38242 Combien qu’il mainent estat gent,
38243 A douleur et a meschief vivent
38244 Pour ce que tous meschiefz les sivent,
38245 Et ilz les doivent bien sieuir,
38246 Avecquez ce tout bien fuïr.
38247 Il en y a monlt peu d’aisiez.
38248 Les bons diray, se vous taisiez,
38249 Comment ilz sont tous serfz vilain
38250 En leur pays, et prez et loing.
38251 Puis que gentilz se voeullent dire
38252 Et j’en voeul la cause descripre.
38253 Tout a premierement venir,
38254 Aulx gentilz fis les fiefz tenir.
38255 Et fief si est de tel nature,
38256 Paisible preudoms n’en a cure.
38257 L’un et l’autre tiennent de fié
38258 Et si en sont joyant et lyé,
38259 Et se ilz tresbien cler vëoient,
38260 De tenir ja lié n’en seroient,
38261 Car nul a fief tenir n’aprent,
38262 Se de souverain ne le prent.
38263 Le petit reprent du greigneur.
38264 Et le greigneur prent du seigneur.
38265 Ainsi tiennent chascun a gré,
38266 Montant de degré en degré.
38267 Tout et chascun subgiet se rent,
38268 Et cellui de qui le fief prent.
38269 Et pour ceste subgectïon
38270 Se dient de noble nacïon :
38271 « En fief tenons, tous nobles sommes.
38272 [Et] ne sommes pareilz aulx hommes. »
[110b]
38273 Iceulx nobles firent requeste
38274 (Et leur sembla monlt estre honneste)
38275 Au roy Hutin, de France né,
38276 Filz Phelipe le Bel aisné,
38277 Que ilz peüssent l’un sur l’autre
38278 Guerrïer a lance sur [f]aultre
38279 Si tost que s’entremefferoient.
38280 Cecy requirent, et ilz l’oyent.
38281 Plus mal pour eulx querir ne porent,
38282 Ja soit ce que ainsi le volrent.
38283 Puis aultre chose ont ilz requise.
38284 « Sire, une ordonnance est[63] mise
38285 En Champagne especïalment,
38286 Qui y est, il a longuement.
38287 Quant nous une amende faisons,
38288 Soixante livres y paions,
38289 Et les bourgois soixante solz.
38290 Et par my ce, ilz sont absoulz.
38291 Si nous faites ceste bonté :
38292 S’aucun bourgois nous fait durté,
38293 Pour soixante livres soions
38294 Quittes, se cellui ochïons. »
38295 Lors le roy Hutin leur a dit
38296 Que il leur accordoit ce dit,
38297 Que par my les soixante livres
38298 D’eulx ochire seront delivres.
38299 « Et ilz aussi quittes seront
38300 Toutteffois qu’ilz vous ochiront
38301 Pour soixante solz seulement,
38302 Seront com vous pareillement.
38303 Se voulez ottroyer ce point,
38304 Je l’ottroye de point en point. »
38305 Ad ce ne s’acorderrent pas.
38306 Or venray a mon premier pas :
38307 De ce vous poeult bien souvenir
38308 Quel chemin ilz vaulrent tenir.
38309 Les guerres entr’eulx se donnerent.
[110c]
38310 Accordé fu, ilz l’acorderent.
38311 Or est ore ainsi en present.
38312 Plus tost ne tourne cocq a vent
38313 Que l’un a l’autre se courouce
38314 Et se trouble et se degrouche,
38315 Et plus tost se sont couroucié
38316 Qu’on n’aroit ung cheval lïé,
38317 Et lors mandent ilz leurs fiefvez
38318 Dont cy devant oÿ avez,
38319 Et trestous iceulx qui d’eulx tiennent
38320 Que tantost tous a eulx s’en viennent,
38321 Garnis d’armes et de chevaulx,
38322 Ou tout est perdu, mons et vaulx.
38323 Or convient celle vie prendre,
38324 Vielz haubert l’un a l’autre joindre.
38325 C’est forcé, a cellui ilz viennent
38326 Ou ilz perdent quancquez ilz tiennent.
38327 Tantost que l’un en deffaulra,
38328 Quanqu’il tient de lui ou prendra,
38329 Qui lors verroit chevaulx acroire,
38330 Lÿer leur chetif corps en foire,
38331 Acheter de l’un denier trois
38332 Vielles selles et vielz harnois.
38333 Tout a creance acheteront
38334 Et d’un denier trois en douront,
38335 Et feront illec les grans sommes
38336 Et obligeront corpz et hommes.
38337 Cellui en guerre s’en ira.
38338 Ne sçay qui plus grant peur ara,
38339 Ou le cachant ou le sieuant.
38340 Aucun y ara cler coyant
38341 Qui sur lui le destour prenra,
38342 Ou paix ou treves lui doura.
38343 Lors revenderont leur harnois,
38344 Ou aulx marchans, ou aulx bourgois.
38345 Ce que dix livres coustera,
38346 Soixante solz envis ara.
[110d]
38347 Et cilz soixante solz aront
38348 Qui ja proffit ne leur feront.
38349 Et cilz leveront mandement
38350 Qui sera de grant coustement.
38351 Trestout sera saisi et pris
38352 Et tout quanqu’il a mis a pris.
38353 Son denier a benque n’y vault.
38354 Or revient ung aultre deffault :
38355 En celly deffault qu’il ara
38356 Aultre vient qui le sommera
38357 De qui il poeult de fief tenir
38358 Que il le viengne soustenir.
38359 Or reconvient querir a fais
38360 Vielz haubregons et vielz harnais,
38361 Vielz hachinetz tous enfumés
38362 Et vielz chevaulx tous esclopés,
38363 Et s’il n’y va, il soit certain
38364 Ce qu’il a yert hors de sa main.
38365 Bourgois, marchant le garderont
38366 Qui tout cel convive verront.
38367 Plus le verront a grant mesaise,
38368 Et plus seront a leur cœur aize.
38369 Or reconvient chevance faire.
38370 Et aultres chevances attraire
38371 Monlt lui convient de fois mentir,
38372 Car ne poeult pas convent tenir,
38373 Et quant ce convient a paier,
38374 Il n’est mie a esmaier.
38375 Aller ne poeut la droite voye,
38376 Mais par trichy et par forvoye,
38377 Fuïte et liberacïon,
38378 Et tout a sa confusïon.
38379 Or lui convient maistre servir
38380 Et lui vil[e]ment asservir.
38381 Et se ce dollent fief voeult vendre,
38382 Et qu’aucun fol y voeulle entendre,
38383 Le denier maille vendera.
[1] Raynaud édite meü, ce qui rend le vers hypermétrique.
[2] Raynaud corrige en de Pharaon.
[3] Raynaud supprime ce mot.
[4] Raynaud corrige en Et nulle.
[5] Raynaud supprime ce mot.
[6] Raynaud corrige en se en.
[7] Raynaud corrige en Et.
[8] Raynaud corrige en poeult il.
[9] Raynaud corrige en Mon beaulx.
[10] Raynaud corrige en en vie puisse.
[11] Raynaud corrige en et tant contens.
[12] Raynaud corrige en grant dampnement.
[13] Vers manquant ; pas d’équivalent dans A.
[14] Raynaud corrige en ay je.
[15] Raynaud corrige en A le faire.
[16] Raynaud ne corrige pas.
[17] Vers manquant.
[18] Raynaud édite menguent.
[19] Rayand ne corrige pas.
[20] Raynaud supprime ce mot.
[21] Raynaud corrige en qu’ilz.
[22] Raynaud corrige en de son.
[23] Raynaud corrige en m’ont.
[24] Raynaud corrige en Mais or.
[25] Raynaud corrige en Des païens toute est poeuplee.
[26] Raynaud corrige en Qui donc.
[27] Raynaud corrige en Et qui.
[28] Raynaud corrige en ot valee.
[29] Raynaud corrige en et vaux.
[30] Raynaud supprime ce mot et édite ancïennement.
[31] Raynaud corrige en obscurité.
[32] Raynaud corrige en et.
[33] Ms. demoura.
[34] Vers manquant.
[35] Raynaud corrige en souviengiés.
[36] Raynaud corrige en Car par.
[37] Raynaud corrige en premiers il.
[38] Raynaud corrige en Que la.
[39] Raynaud corrige en ou bien.
[40] Vers faux.
[41] Raynaud corrige en il eüst.
[42] Raynaud corrige en Iceste.
[43] Raynaud supprime ce mot.
[44] Raynaud corrige en fu.
[45] Raynaud corrige en ne puis je ne doy je estre.
[46] Vers manquant ; pas d’équivalent dans A.
[47] Raynaud corrige en la droitte.
[48] Raynaud édite deüssent, ce qui rend le vers hypermétrique.
[49] Raynaud supprime ce mot.
[50] Raynaud ne corrige pas.
[51] Raynaud corrige en rechevront.
[52] Raynaud corrige en demourront.
[53] Raynaud ne corrige pas.
[54] Raynaud corrige en Philippes.
[55] Ms. il.
[56] Raynaud supplée je.
[57] Raynaud corrige en Champaigne.
[58] Raynaud corrige en Phlipe.
[59] Rayanaud ne corrige pas.
[60] Raynaud corrige en ore.
[61] Raynaud corrige en que elle, ce qui rend le vers hypermétrique.
[62] Raynaud corrige en ore.
[63] Raynaud corrige en or est.
